Plantun de Prouvènço

Pèr coumpara dos planto d'encò nostre

Arthrocnemum macrostachyum & Scleranthus annuus

Engano(-verdalo)

Arthrocnemum macrostachyum

Amaranthaceae Chenopodiaceae

Àutri noum : Perso-pèiro, Salicor, Sausouiro, Sansouiro.

Nom en français : Salicorne glauque.

Descripcioun :
Aquesto engano, que s'atrobo soulamen en ribo de la Mieterrano dins li mitan sala, èi lignouso e formo de bouissoun. Se recounèis à si pouncho qu'an uno escavaduro (fotò), e à si pichòti lojo simplo que soubron après la cabusso di grano (fotò). Coumpara emé Sarcocomia fruticosa.

Usanço :
Lis engano soun coumestiblo e se manjon en ensalado se soun pas trop duro, e peréu esboulentado, adoubado coume de baneto. Bèn li lava que pòu i'agué de parasite dangeirous (letouspiròsi dóu ragoundin e douvo dóu fege).

Port : Aubret
Taio : Pancaro entresigna
Fueio : ges
Tipe bioulougico : Faneroufite
Cicle bioulougico : Planto renadivo

Gènre : Arthrocnemum
Famiho : Amaranthaceae
Famiho classico : Chenopodiaceae

Coulour de la flour : Verdo
Petalo : ges
Ø (o loungour) flour : Pancaro entresigna
Flourido : Estiéu - Autouno

Sòu : Ca
Autour basso e auto : Pancaro entresigna
Aparado : Noun

Liò : Mar - Sansouiro - Sablo
Estànci : Termoumediterran
Couroulougi : Pancaro entresigna
Ref. sc. : Arthrocnemum macrostachyum (Moric.) K.Koch, 1853 (= Arthrocnemum glaucum Ung.-Sternb., 1876 )

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.